پیشیک کیمی‌لر

پیشیک کیمیلر(Felidae)

پیشیک کیمیلر بولونمه لری

پیشیک کیمیلر اَت جیللر دسته سینه عایید بیر یاریم دسته دیر. اورتاق خصوصیت لری، گؤرونوشلری و داورانیشلاری ایله فامیلین ان یایقین و تانینمیش منسوبو اولان ائو پیشیگینه اوخشارلیقلاری دیر. ظریف بدنلری، یوموشاق توکلری، قیسسا صوراتلاری و عمومیتله وجودلارینا گؤره کیچیک بیر باشلاری واردیر. قولاقلاری دیک و بیز یادا گیرده دیر و هر یونه دوغرو چئوریله بیلیر. ان کیچیکلری 30سانتیمتره، ان بؤیوکلری ایسه 200سانتیمتره اولور. پیشیک کیمیلر محتشم بیر ائشیتمه قابیلیتینه صاحیبدیر. ائشیتدیکلری فرکانس 65000Hz قدر چاتابیلیر، بو دا اینسانداکینین اوچ قاتیدیر. پیشیک کیمیلر ایکی قولاغینی بیربیریندن باغیمسیز شکیلده فرقلی یؤنلره دوغرو حرکت ائتدیره بیلیر. قولاقلاریندا اووزون قیللار خاریجی مادده لرین قولاقلارینا گیرمه سینی قارشیلار. بیر پیشیگین قولاقلارینی یاتیرماسیندان، اونون مودافیعه یه حاضیرلاندیغی آنلاشیلیر. پیشیک کیمیلرین آغیزلاریندا 30 عدد دیش واردیر. چیتا، بالیقچی پیشیک و یاستی باش پیشیک خاریجینده بوتون پیشیک کیمیلر جایناقلارینی بارماقلاریندان اوزادیب تکرار گئری ییغا بیلیرلر. پیشیک کیمیلرین هامیسینین قویروقلاری واردیر. دنگه لرینی ساخلاماق و اؤز آرالاریندا ایشارتلرله آنلاشماق اوچون قویروق اؤنملیدیر. بعضی توورلرده، اؤرنه ییی واشاقلاردا(بیر توور وحشی پیشیک) قویروق چوخ قیسسادیر. پیشیک کیمیلر گونئی قوطبونون خاریجینده دونیانین هر یئرینده تاپیلار. آووسترالیا و اقیانوسیا دا یاشایان پیشیک کیمیلر اینسانلار طرفیندن آپاریلمیشدیر. پیشیک کیمیلر اوچ یاریم فصیله یه بؤلونور:

• بؤیوک پیشیک لر: آسلان، قافلان، جاقوار و پلنگ
• چیتالار ساده جه چیتا توورونو داخیل ائدن یاریم فصیله
• کیچیک پیشیک لر پیشیک کیمیلر فامیلینین دیگر بوتون توورلرینی داخیل ائدن یاریم فصیله

عمومیتله، کوکره یه بیلن پیشیکلرین بؤیوک پیشیکلر اولاراق آدلاندیریلماسی قبول ائدیلیر. کیچیک پیشیکلر کوکره یه بیلمز آمما کئفدن خورلار. بؤیوک پیشیکلر ساده جه نفس وئریرکن خورلایا بیلیر. کیچیک پیشیکلر هم نفس آلیرکن، همده نفس وئریرکن خورلایا بیلیر. چیتانین سسی کؤپک سسینه بنزر.