اکبر نعیمی

اکبر نعیمیآذربایجانین میلّی مدنی فعال‌لاریندان دیر. او ۱۳۶۲–جی هیجری گۆنشلی ایلده خوی شهرینده آنادان اولوب


حیاتیدَییشدیر

اکبر نعیمی ۱۳۶۲–جی هیجری گۆنشلی ایلده (07/06/1362) خوی شهرینده دوغولموشدور. ایلک اوخول دؤنَمینی خویون حافیظ مدرسه‌سینده، اورتا اوخول دؤنَمینی صدر مدرسه‌سینده، سون اوخول دؤنَمینی ایسه خویویدا اوخویوب بیتیردی. عسگرلیک دؤنَمینده 4 آی اؤزل ائییتیم آلاندان سونرا، عجب‌شئر پادگانیندا مَشقچی(مربی آموزشی) اولور. اکبرین ایلگی‌لندیگی گئنل قونولار، موسیقی، ایدمان، فیلم، ژورنالیست‌لیک، کیتاب و ... دیر. 1389-جو ایلده خویون آزاد ایسلامی یونیوئرسیته‌سینده تاسیسات موهندیسلیینین دیپلوماسینی آلیر. ائله همان ایلدن خویون گاز چَکمه ایداره‌سینده ناظیر اولاراق ایشه باشلاییر. میللی فعال ابراهیم جعفرزاده‌نین اؤلوموندن سونرا، خویون گاز ایداره‌سینین ناظیرلیییندن، اوشنویه ایله خانادا گاز چَکمه ناظیری تعیین اولونور. 1391-جی ایلده قزوین ایالَتینین گاز ایداره‌سینده، گاز چَکمه پروژه‌لرینه باش ناظیر سئچیلیر، آنجاق همان ایل هما اوچاق یوللارینین سیناویندان کئچدیکدن سونرا، تئهراندا ایشله‌مه‌یه قرار وئریر.

سیاسی فعالیتلریدَییشدیر

1391-دن توتولان گونه دک (1398-جی ایلین بهمن آیی)، اوچاق‌لارین سیستئم‌لرینین مئکانیک بؤلمه‌سینده اوچاق تئکنئسییَنی اولاراق ایشله‌ییر. اکبر توتولان گونه دک، ائولَنمه‌یی دوشونسه ده ائولنمه‌یه ایمکان تاپمیر. او چئشیدلی قونولار ایله ایلگی‌لَنیر. ایجتیماعی، ایقتیصادی، سیاسی قونولارا جیددی گیریشیر. او "اَورین" درنه‌یینین مرکزی شوراسیندان اولور. اَورین باغلانانا کیمی، یولداشلاری ایله بیرلیکده موختلیف کیلاس‌لار ایله اوتوروم‌لار قورورلار. 1392-جی ایلدن گونه‌باخان درنه‌یینی نئچه یولداشی ایله بیرلیکده قورورلار. بو درنَکده ده، سوسیال، کولتورل، بؤلگه‌سل، ایقتیصادی اوتوروم‌لار قورورلار. بو دؤنَمده فرقلی گؤروشلو موتخصیص اینسانلاردان اؤیرَنمه‌یه ایمکان یارادیرلار. اکبر، سورونلارین اوزون سورَلی چؤزولدویونه ایناناراق، شهرده، بؤلگه‌ده، اؤلکه‌ده الی چاتان بوتون یئتگی‌لر ایله، میللی-مدنی ایستَک‌لری بَللی بیر شکیلده اورتایا قویماغا چالیشیر. عئینی حالدا دوشونجه آدام‌لاری ایله ده ایلگی‌لَنمه‌یه باشلاییب، دوشونجه‌لرینی پایلاشیر. اونا گؤره، هئچ واخت دایانمادان بوتون آلانلاردا دوشونجه‌سیندن یارانان ایستک‌لرینی ائشیده بیلینه‌جک بیر بیچیمده اورتایا قویماغا چالیشیر. بو ایلگی‌لَنمک، فرقلی قاپی‌لاری میللی دوشونجه‌نین یاییلماسینا آچماق ایله بیرگه، حساسیت‌لری ده اونا آرتیریر. بو سایاقدا ایلگی‌لَنمه‌لر هر طرفدن باسقی‌لاری آرتدیریر (1391-جی ایلدن ساها ایله فنی ایزله‌نیلمه‌یه آلیرلار، توتولان میللی فعال‌لارین بیر چوخونا اکبرین ایزلَنمه‌یینی بیلدیرمیشدیلر). اکبر یولونا ایناناراق، باسقیلاری اؤنَمسه‌میر. بو دایاناقلیق اونون یاخالانماغینا سبب اولور. اکبر 1398-جی ایلین بهمن آیی‌نین 2-سینده ساعات 12-ده ایش یئرینده (مهرآباد هاوا آلانینین، اوچاق موخَنلیک کارگاهلاریندا) اطلاعات قوه‌لری طرفیندن یاخالانیب، مولکو ائوینه گؤتورولوب، کیتاب‌لار، لب‌تاپ، درگی‌لرینین بیر بؤلومو ظبط ائدیلیب، ائوین دوستاغین 209 نومره‌لی گیزلی بؤلمه‌سینه آپاریلیر. بیر آیا یاخین تک سلّول‌دا سورغو-سوالا چکیلندن سونرا، همین بندین نئچه نفرلیک سلول‌لارینا یوللانیر. 20جی گون 200 میلیون تومان وثیقه‌یه وئریلمه‌یینه باخمایاراق، سون آن وثیقه‌نی آلماقدان امتیناع ائله‌ییب، بایرام آیینین 26-سینا دک ساخلاییرلار. بایرام آیی‌نین 26-سیندا آغیرلانمیش وثیقه‌ ( 200 میلیوندان 600 میلیون تومانا) قارشیلیغیندا کئچیجی اولاراق زینداندان آزاد اولونور. 1399-جو ایلین بهمن آییندا، ایلک محکمه‌ده تهرانین انقیلاب محکمه‌سی‌نین 26-جی شوعبه‌سی(قاضی ایمان افشاری) طرفیندن، 9 ایل 8 آی حبس، ایکی ایل اؤلکه‌دن چیخیش قاداغاسی، ایکی ایل سیاسی-اجتماعی قوروملارا باغلی چالیشمالار قاداغاسی، 90 صفحه‌لیک یازی یازماغا محکوم اولونور. 1400-جی ایلین تیر آییندا تجدید نظر محکمه‌سی (تهرانین انقیلاب محکمه‌سی‌نین 36-جی شوعبه‌سی قاضی زرگر باشچی‌لیغیندا) ، حؤکمو عئینی اولاراق تصدیق‌له‌ییر. تیرین 28-ده تبریزده یاخالانیب، ائوین زیندانینا یوللانیلیر. 209-دا اولدوغو دؤنَمده ایلک اون گون کیمسه ایله تیلفون باغلانتی‌سی اولمور. 54 گونده هئچ بیر وکیلی اولمور. ایلکین اتهامی گئنل بیر اتهام اولور: "پان تورکیزم". گئنل اتهام‌لا ساخلادیق‌لاری اوچون یونگول وثیقه ایله بازداشت قراری وئریرلر. اکبر هئچ نه‌یی بوینونا آلمیر، وثیقه‌یه وئریلسه ده، سون لحظه وثیقه‌نی دایاندیریب، یئنی اتهام‌لار وورماق قصدی ایله، یئنی دوسیا آچیرلار. بو دوسیانی دولدورماق اوچون، 4 یول سئچیرلر؛ 1- کئچمیشده باغلانمیش دوسیالار (1392-جی آنا دیلی گونو تؤره‌نین دوسیاسی)، 2- امنیتی قوه‌لرینین مئیدانی آداملارینین راپورو (اکبر سورغودا اولاندا، یوخاری روتبه‌لی بیر ظابیطین اکبرین بوش یئرینه توتماما ایسته‌یینه، بازجولار "حاجی اردبیل‌دن قویمورلار اؤتورک، دئییرلر سیز بوش توتورسوز بیزیم ایشیمیزی چتینله‌شدیریرسیز" جومله‌سی ایله جاواب وئریرلر) بو راپور بیرینجی حؤکمونده ده گلیب دیر. 3- فرقلی شهرلرده توتولوب، بازجولارین "تک نویسی" ایسته‌یینی یئره سالمایان بعضی آدام‌لار. بو راپور دا، حؤکمونده "وحدت اظهارات مطلعین" عنوانی ایله یئر آلیر. 4- سانال دونیاسینا دایانان بلگه‌لر (فئیس‌بوک، واتساپ، تلگرام (کمیته اقوام الیاس حضرتی، ...). بو راپور دا حؤکمونده گلیر. ماراقلی‌سی بو کی، اکبر هئچ بیر قوروپون قوروجوسو، دولاندیریجی‌سی، و بیر نئچه‌سینده یازی بئله یازماسا دا، اونلارا دایاناراق آغیر جزالاری وئریب‌لر. اکبر ایشیندن چیخاریلیر. دؤنه‌لر ده ایشین دالیسیجا گئتسه ده، ایشله‌مه‌یینه ایمکان وئرمیرلر. اونونلا بیرگه 1391-دن اوردا توپلانان حاقلارینی دا وئرمیرلر. 20/10/1399 ده تهرانین اسلامی اینقیلاب محکمه‌سی‌نین 26-جی شوعبه‌سی‌ طرفیندن اکبره قارشی محکمه‌یه چاغیریش بلگه‌سی یوللانیلیر. بو دؤنمده جناب حسین‌زاده اکبرین وکیل‌لی‌یینی عهده‌له‌نیر.

اکبره وورولان اتهام‌لار بونلار اولور: - معاند قوروپلارین چیخارلاری اوزره ایران اسلام جمهوریتینه قارشی تبلیغ آپارماق، - اؤلکه‌نین تهلوکه‌سیزلی‌یینه خطره سالماق اوچون ییغیشما(اجتماع) ایله قوروشما(تبانی)، - سئپاراتچی "پان تورکیسم ایله پان‌آذریسم" قوروپلارینی دولاندیرماق ایله اؤلکه‌نین تهلوکه‌سیزلی‌یینه قارشی جورم ایشله‌مک - سئپاراتچی "پان تورکیسم ایله پان آذریسم" قوروپلاریندا عوضو اولماق ایله اؤلکه‌نین تهلوکه‌سیزلی‌یینه قارشی آددیم آتماق.

یوخاریدا گلن سوچلامالارلا، تئهرانین اینقیلاب محکمه‌سی‌نین 26-جی نومره‌سینده، قاضی افشاری‌نین باشچیلیغی ایله 1399-جی ایلین بهمن آیی‌نین 18-ی گونونده، بئله بیر قرار وئریلیر (بو دؤنَمده وکیلی جناب حسین‌زاده ایدی). "تئهران ایالتینین اطلاعات قورومونون راپورونا دایاناراق، اکبر نعیمی‌، آتاسی موراد، ساوادلی، 1362-جی دوغوملو حاقیندا، وورولان ایتهاملارا { معاند قوروپلارین چیخارلاری اوزره ایران اسلام جمهوریتینه قارشی تبلیغ آپارماق، اؤلکه‌نین تهلوکه‌سیزلی‌یینی خطره سالماق اوچون توپلانما(اجتماع) ایله قوروشما(تبانی)، سئپاراتچی "پان تورکیسم ایله پان‌آذریسم" قوروپلارینی دولاندیرماق ایله اؤلکه‌نین تهلوکه‌سیزلی‌یینه قارشی جورم ایشله‌مک، سئپاراتچی "پان تورکیسم ایله پان آذریسم" قوروپلاریندا عوضو اولماق ایله اؤلکه‌نین تهلوکه‌سیزلی‌یینه قارشی آددیم آتماق} گؤره تئهرانین عمومی و اینقیلاب محکمه‌سی سوچلاما بلگه‌سی (کیفرخواست)، محکمه دوسیانین ایچه‌ریلی‌یینی آراشدیرما، بوتون بلگه‌لر، محکمه سورَجینده اوزاق گؤرَنلیک و تیتیزلیک، آراشدیرما پروسئسی، عنوان اولونان‌لارین نئجه‌لیگی قونویا منسوب اولان قانونلار ایله اویغونلوغو، بلگه‌لره یانسی‌یان آراشدیریجی مقامین آپاردیغی تدقیق‌لره دایاناراق، ها بئله الف- متهمین گؤردویو ایشلَرین بیر بؤلومونو بوینونا آلماغی، باشقا بؤلوم‌لری دانیب، قاباقدان گلن‌لیگی ایله بیربیرنه ضید سؤزلری، ب- اؤزل ضابیط‌لرین ایلکین و تاماملاییجی راپورلاریندا عهده‌لی داورانیش‌لارین قلمه آلینمیش خولاصه‌سی ، پ- پئسیخولوژی و مادی ائلئمئنت آراسیندا کؤنول‌لو بیر ایلگی‌نین اولدوغونا چاتماق، ت- دلیل‌لر ایله سندلری ایتیک و شوبهه‌دن قوروماق اوچون اونلاری دوسیا دوزَلمه‌میشدن اؤنجه‌دن ییغیب ساخلاماق، ث- سانیغین ائتگیلی ساوونماسی‌نین اولماماسی، ج) آراشدیرمانین فرقلی دؤنم‌لرینده بیلگی‌لی کیمسه‌لرین(اطلاعاتا یوللاری دوشَن آدام‌لارین) اؤز ایش‌لر ایله باشقالارینین ایش‌لرینی آیرینتیسی ایله بیلگی‌لندیردیک‌لرینین عئینی اولماسی، چ) مأمورلارین تئکنیکی آراشدیرما، کشفیات و ساها گؤزتله‌مه‌لری‌، ح- دوسیا اوچون حاضیرلانان فوتو شَکیل‌لر، خ- ائوینده تاپیلان جوزوه‌لر، د- سانیغین باشقالاری ایله دانیشیق ایله ایلگی‌لرینین ایچه‌ریلی‌یی، اؤلکه‌نین تَهلوکه‌سیزلییینی خطره سالماسی‌نین گؤستَرگه‌سی دیر، ذ- سئپاراتچی کیمسه‌لر ایله نئچه اوز-اوزه گؤروش، آذربایجانین فرقلی شهرلرینده اوتوروم قورماق، او جومله‌دن 1392-جی ایلین ایسفند آیی‌نین ایکی‌سینده‌کی اوتوروم یولداش‌لارینین بیرینین ائوینده، یولداشینین خانیمی‌نین دوغوم گونو باهاناسی ایله قورولور، حال بو کی، ائو یییه‌سی‌نین خانیمی‌نین دوغوم گونو تیر آییندا ایدی، بو اوتورومدا آذربایجان مارشی چالینیب، گاموح بایراغی آسیلیر، سانیق اوردا دانیشیق آپاریر، بو قونویا باغلی یوخلاما جلسه‌سینده سوچلامالارا قاندیریجی جاوابی اولمور، چالیشیر قونونو جایدیرا. سوال یئری بوردا دیر؛ ندن اؤترو، یولداشی خانیمی‌نین دوغوم گونو تؤره‌نینه گئدیر، نه‌یه گؤره دوغوم گونو تؤره‌نینده آذربایجان مارشی چالینیر، نه‌ سببدن بیر گروهون بایراغی آسیلیر، هانسی سبب‌دن دوغوم گونونده دانیشیق آپاریلیر، ندن اؤترو او خانیمین دوغوم گونو تیر آییندا اولا-اولا، تؤرَن ایسفند آییندا توتولور. ر- جاسوس‌لوق سئرویس‌لرینه باغلی سئپاراتچی جریان‌لاریندان باشچی‌لاری ( محمود فاضلیان، ارسلان کامرانی، ...) ایله ایلگی‌لنمک. سایدیغیمیز دلیل‌لر ایله سندلرین بیرلَشیمینه دایاناراق، آدی گلدییی آداملارین سوچلو اولدوغونا اینانیب، اونونلا بیرگه، سوچو تؤرَتمیش شخصین ذئهنی و پئسیخولوژی دورومونا و تؤرَتمه طرزینه، تؤرَتدیی یانلیش یولدان هله ده پئشمان اولمادیغینا، اونون ضررلی ائتگی‌لرینه و داورانیش‌لارینا دیقت وئریلمه‌سی، او ائتگی کی ایران میلتی‌نین آراسیندا آیری-سئچگی‌لیگه سبب اولاجاق، اینادیریجی سوچلامالارین سونولدوغونا باخمایاراق، یئنه ده سوچلامالاری دانیر، نتیجه‌ده باش وئرَن جورمون نئجه‌لیگی(کیفیت) ایله نئچه‌لیگی(کمیت) اؤلکه‌یه چوخلو زیان وئریر. 1392-جی ایلده تصویب اولان آئین دادرسی کیفری‌نین 374-جو ماده‌سی ایله 1399-جی ایلین حبس جزالاندیرماسی‌نین آزالتما قانونون 2- 12 ماده‌لرینی نظرده توتاراق، 1392-جی ایلده ایسلامی جزالاندیما قانونون 18-23-134 ماده‌لری، ها بئله همان قانونون 499-500-610 ماده‌لرینه دایاناراق سانیغین؛ 4 ایل حبس تهلوکه‌سیزلی‌یه قارشی توپلانیب قوروشما، 8 آی حبس نیظام ایله موخالیف گروهلارین نفعینه تبلیغات، 5 ایل حبس قانونسوز گروهلاریندا اویه اولماق، اؤنجه‌کی حبسده‌کی گونلری حئساب اولوناراق، اؤلکه‌دن ایکی ایله قدر چیخماما قاداغاسی، ایجتیماعی-سیاسی پارتی‌یالار ایله قوروم‌لاردا عضو اولما قاداغاسی، 90 صفحه‌لیک ال یازما آراشدیرما، ایستیعمارین آیری-سئچگی‌لیک قونوسونو ائتنیک‌چیلیک آراجی ایله، آغیل ایله شرع باخیمیندان اومت ایسلامی‌نین بیرلیگی‌نین ضرورتی، ایکی صفحه‌ده ده ایرشاد باخانلیغینین جوازلی کیتابلاریندان (ایسلام، قومیت ایله میلیت امامین گؤروشوندن- قومیت ایله قومیت‌چی‌لیک ایراندا) قایناق وئرمک، جزالانماسینا حؤکم وئریلیر. آنجاق، سوندا دئییلن قونو ایله باغلی (گروه قورماق ایله دولاندیرماق)، دوسیادا اولان بلگه‌لری آراشدیراندا، اونونلا بیرگه سانیغین دانیشیق‌لاری ایله داورانیشی نظرده آلاندا، بو جَزا عونوانی ایله اویغون گؤرونمور، بو سوچلامایا برائت وئریلیر. "

قایناقلاردَییشدیر

https://www.radiofarda.com/a/31435246.html https://ipa.united4iran.org/fa/prisoner/5758/ https://iranwire.com/fa/news/tehran/51005 https://www.aa.com.tr/fa/%D8%A7%DB%8C%D8%B1%D8%A7%D9%86/%D8%AA%D8%A7%DB%8C%DB%8C%D8%AF-%D8%AD%DA%A9%D9%85-9-%D8%B3%D8%A7%D9%84-%D9%88-8-%D9%85%D8%A7%D9%87-%D8%AD%D8%A8%D8%B3-%D8%A8%D8%B1%D8%A7%DB%8C-%DB%8C%DA%A9-%D9%81%D8%B9%D8%A7%D9%84-%D8%AA%D8%B1%D9%8F%DA%A9-%D8%AF%D8%B1-%D8%A7%DB%8C%D8%B1%D8%A7%D9%86-/2311576 https://www.youtube.com/watch?v=nsJafdsd7wk https://www.radiozamaneh.com/678749/ https://humanrightsinir.org/akbarnaiemi/ https://khabar.us/news/200515/%D8%AA%D8%A7%DB%8C%DB%8C%D8%AF-%D8%AD%DA%A9%D9%85-%DB%B1%DB%B0-%D8%B3%D8%A7%D9%84-%D8%AD%D8%A8%D8%B3-%D8%A7%DA%A9%D8%A8%D8%B1-%D9%86%D8%B9%DB%8C%D9%85%DB%8C-%D8%AF%D8%B1-%D8%AF%D8%A7%D8%AF%DA%AF%D8%A7%D9%87-%D8%AA%D8%AC%D8%AF%DB%8C%D8%AF%D9%86%D8%B8%D8%B1-%D8%AA%D9%87%D8%B1%D8%A7%D9%86 https://bciran.org/%D8%A7%DA%A9%D8%A8%D8%B1-%D9%86%D8%B9%DB%8C%D9%85%DB%8C-%D9%BE%D8%B3-%D8%A7%D8%B2-%D8%A8%D8%A7%D8%B2%D8%AF%D8%A7%D8%B4%D8%AA-%D8%A8%D9%87-%D8%A7%D9%88%DB%8C%D9%86-%D9%85%D9%86%D8%AA%D9%82%D9%84-%D8%B4/ https://fa.al-ain.com/article/security-forces-arrest-akbar-naimi-in-tehran https://radiftarin.com/link_page.php?id=145356 https://gunaz.tv/index.php/fa/new/SH.%D8%AEA1-44-=-1635315587[دائمی اولو باغلانتیلی]


اتک‌یازیدَییشدیر