حسین واحدی
حسین واحدی (دوْغوم ۱۳۶۰/۰۸/۰۸) اورمیه -لی یازیچی و تۆرک دیلینین خادیمیدیر.[۱]
| حسین واحدی | |
|---|---|
 | |
| آد | حسین واحدی |
| قیسا بیلگی | یازیچیٛ |
| دوْغوم تاریخ | ۱۳۶۰/۰۸/۰۸ اورمیه |
| میللیت | تۆرک |
| تحصیل | تبلیغات و رئکلام مدیرلییی |
یاشاییش و چالیشمالاری
دَییشدیرآتا-باباسی «بؤیوک مرنگه‌لی» کندیندن «باش‌قالا چیچکلی» کندی ایله «تپه گؤیجه‌لی» کندینه کؤچه‌رک اؤزو ده ایران-عیراق ساواشیندا دا چیچکلی کندینده یاشاماغی تجروبه ائتمیشدیر. او، اورمیه شهرینده بویا باشا چاتاراق تحصیلاتینی بیتیریبدییر. آنا دیلینه ماراق‌لی اولاراق اؤزو کیتاب‌لار یاردیمی ایله آذربایجان تۆرکجه‌سینی اؤیرنیب. حکایه‌لری، مقاله‌لری و شکیل‌لری، ایران آذربایجانی‌نین موختلیف قزئته، درگی و باشقا قزئته‌لرینده چاپ اوْلوب. اونلاردان آفتاب-ی آذربایجان، شهامت، آغری، نوید-ی آذربایجان، همشهری، بایرام، گولشن-ی راز، ایشیق و.. ...، آد چکمک اولار.[۲]
اثرلری
دَییشدیر
- سئوگی یولچولاری (حکایه توپلوسو- ۱۳۹۱) [۳]
- یابانچی (آلبر کامونون یابانچی رومانی‌نین تۆرکجه ترجمه‌سی ۱۳۹۴)[۴]
- بیاض گئجه‌لر، فیودور داستایفسکی نین قیسا رومانی‌نین کیریل الیفباسیندان کؤچورمه سی، بوتا یایین ائوی، 1396 یاز [۵]
- بیزیم حکایه‌لر (حکایه آنتولوژیسی - اختر یایین‌ائوی - ۱۴۰۲) [۶]
- چؤکۆش - طغرل یایین ائوی - اورمو ۱۴۰۳ - آذر آیی[۷]
رئداکتور
دَییشدیر- بؤیوک ننه (رومان) - یازیچی: رضا تقی زاده ابهری - اورمیه ۱۳۹۵
- آدا (حیکایه‌لر توپلوسو) - یازیچی: زیبا منوچهری - اورمیه ۱۳۹۹ دورنالار یایین‌ائوی[۸]
اؤدوللری
دَییشدیر
- ۱۳۹۱-جی ایلده، «چوخ بیلمیش قولو» آدیندا ساتیرا حیکایه‌سی، «نسلی از آفتاب» (گونش نسیلیندن) فستیوالیندا، طنز حیکایه بؤلومونده بیرینجی حیکایه سئچیلیبدیر. بو فئستیوال، ۶ اوستانین آراسیندا کئچیلیردی.[۹]
- ۱۳۹۲-جی ایلده، اورمیه‌نین بیرینجی ادبی فئستیوالیندا، «دوورالار مه‌لرکن» آدیندا حیکایه‌سی، اوستون اثرلردن سئچیلمیشدیر.[۱۰]
- ۱۴۰۰-جو ایلده، «اورمیا آذ» مئدیاسینین مودیری عنوانیندا اوستون مئدیالاردان سئچیلمیشدیر.[۱۱] [۱۲]
یازیٛ‌لاریٛندان پاراقرافلار
دَییشدیرمن ده قاییداجاغام حئکایه‌سی
دَییشدیر«... ایکیمیز ده سس‌سیز قالدیق. نه یاشارین سؤزو وار ایدی نه ده منیم. یاشار آتاسی گؤندردییی بؤرکو باشیندان چیخاریب اوچ-دؤرد مئتیر او یانا تولازلامیشدی. گؤزوم بؤرکه تیکلیدی. او آن‌دا بیر آزمیش ایت بؤرکون یانینا یئتیشیب آیاق‌لارینین بیرینی قالدیریب بؤرکو موردارلاماغا باشلادی...»[۱۳]
آتامین یوخولاری
دَییشدیر«...ایکیمیزده، سینه-سینه پنجره آلتینا گئدیریک. آتام، اوتاغین یوخاری باشیندا، میتیل پتو اوستونه سره‌له‌نیب، گؤزل چال توکلرینی آلنینا تؤکوب، گؤزلوگونو بورونونا میندیریب، کؤینه‌گینین دوگمه‌لری آچیق‌دی، او آچیق یئردن، قفسه‌یه تای قابیرقالار همیشه‌دن داها دیک و داها برک گؤرونورلر.
نئچه بؤیوک دفتری بیر-بیرینین اوستونه دوزوب، ساغ- سولو دا ایری کاغیذ باغلامالاری ایله قالانیب‌دیر. آما هئچ ایش ائتمه‌ییر. دیش‌لرین آراسینا بیر قلم قویوب، دقت ایله اوتاغین بیر بوجاغینا گؤز تیکیبدیر. آنام بیر داها باشلاییر:
- “بودا اولدو ائو، بودا اولدو حیات، تانریم اؤلوم یوز دفعه بو حیات‌دان یاخشی‌دیر. بیرى یوخدو بو کیشی‌یه دئسین، بورا ایداره دئییل، ائودیر. نه‌دن بو قده‌ر اؤزونو اؤلدورورسن؟ باخ هله، باخ هله، پیشیگه تای گؤزون تیکیب او بوجاغا، ایندی باشلایار، یومولار، نئچه عدد کلله‌سینده قاتیشیب، آییرا بیلمه‌ییر.»[۱۴]
دووارلار مه‌لرکن
دَییشدیر«...کلمه‌لریم سونا چاتان لحظه، آکواریوم پارتلاییب، بالیق‌لاری داغیلیر، کیتاب‌لار قفسه‌دن یئره تؤکولوب، دوکتور گئت- گئده مندن اوزاقلاشدی، دووارلاردان مه‌له‌مک سسی زجر وئریجی اولوب، قولاقلاریمی دارما- داغین ائتدی، تابلولار بیر- بیر جیریلیب یئره سه‌په‌لندیلر، پنجره‌دن گؤرونن آغاجلارین یارپاقلاری، سانکی پاییز، یایین یئرینی آلدی دئیه، سارالیب تؤکولمه‌یه باشلادیلار، لامپا سؤندو، زامان ایتدی، ساعات دا بوتون عددلر، صیفیر اولدو، هر یئردن اوشاق آغلاماسی گلیردی و من زامانین ایچینده بوغولدوم...»[۱۵]
بیزیم حکایه‌لر کیتابینا گؤره
دَییشدیرسرخوش اولما ساعتی
«سرخوش اولون» دئیه شعر دونیاسینی آلت اوست ائدن فرانسه‌نین داهی شاعیری، شارل بودلئرین ساوچی توتومدا بیر سؤزو وار! او، «آما نه ایله؟» سوروشاراق، «شرابلا، شعرله یا دا اَردم‌له» جاواب وئرسه ده، یئنه اؤز جاوابینی یئته‌نک‌سیز بیلیر؛ و «نئجه ایسترسه‌نیز» دئیه آچیق بیر یول یولچولوغویلا «آمما سرخوش اولون» دئییر سونوندا! بونونلا دا «شعر» یوخسا بوتونلوکده «ادبیات» ایله سرخوش اولماقدان سؤز ائتمه‌سی لاپ ماراقلیدیر.
زامان دونیانین کؤتو اوزونو ثانیه‌لری ایله بیرر-بیرر آجی چکدیرَرک اؤنوموزه سرگیله‌میش‌دیرسه، گؤزللیکلر آرایان روحلارا زامانین قاپساملی جایناغیندان چیخیش یولو واردیر هر حالدا. البته آنادیلیمیزده ادبیات دادینی بیزلره دادیزدیران اینسانلار ساغ اولسون؛ اونلارین بیزه گؤستره‌بیله‌جک، شارل بودلئر اؤنردییی سرخوشلوق، بیر آن بئله اولسون دا بیزی اولدوغوموز سوییه‌دن گؤتوروب هر شئیی اونوتدورا دا بیلر.
حسین واحدی‌نین آلتی ایله یاخین یورولماق بیلمه‌ین امه‌یی ایله ییغیلمیش، ایچینده یاشادیغیمیز دونیانی چئشیتلی آچیلاردان رنگ‌به‌رنگ آنلاتیلارلا قاباغیمزا قویان «بیزیم حکایه‌لر» الینیزده‌دیر. آنتولوژینی نئچه یؤندن دیرله‌ندیرمک اولار؛ آنلاتی فورمو، دیل قوللانیمی، آنادیلیمیزده ایفاده اولونان تصویرلر، باخیش آچیلاری، دوزیازی و نثر کیفیتی کیمی آراشدیرمالارا دیرلی وئری‌لر بوراخاجاقدیر. بیر بئله ایشین باشلانغیجی بونلارین توپلاییب بیر یئره ییغماسی ایله باشلاناجاق…»[۱۶]
قایناقلار
دَییشدیر- ^ ماهنی درگیسی
- ^ http://ishiq.net/?p=14980
- ^ حوزه هنری-نین سایتی. آرشیولنیب اصلی نۆسخه‌دن on 2016-03-08. یوْخلانیلیب2016-03-12.
- ^ archive copy. آرشیولنیب اصلی نۆسخه‌دن on 2016-08-01. یوْخلانیلیب2016-03-12.
- ^ http://yolpress.ir/?p=38116
- ^ https://ca.axar.az/news/kult/811903.html
- ^ https://w.wiki/CQRe
- ^ علم نت سایتی
- ^ ishiq.net
- ^ نفرات برتر"اولین جایزه ادبی اورمیه" معرفی شدند
- ^ معرفی نفرات برتر نخستین جشنواره رسانه‌ای و هنری شهرنگار
- ^ خبرنگاران جوان آدلی خبر آژانسی
- ^ من ده قاییداجاغام
- ^ آتامین یوخولاری
- ^ دووارلار مه‌لرکن
- ^ سرخوش اولماق ساعاتی - شریف مردی