قونداق-قونداق(اویون)

قوُنداق–قوُنداق — آذربایجاندا ان چوخ یازقاباغی (بایرام‌قاباغی) گونلرده، ائلجه ده دیگر مؤوسوملرده اساساً اوشاق و گنجلر آراسیندا، گئنیش شکیلده اوینانیلان قدیم اویونلاریندان بیریدیر.

عومومی معلومات

قونداق–قونداق اویونونو هله ایندیکی توپلارین مؤوجود اولمادیغی دؤورلرده اویناییردیلار. هله او زامان ایندیکی توپلار کوس آدلاندیریلیردی. حاضیردا اصل توپلا اوینانیلان بئله اویونلاری "ایشلتدی" و یا "اورتاداقالدی" آدلاندیریرلار.

اویونون قایدالاری

10-15 اویونچو ییغیلیب دؤوره ووروب یئرده اَیلشیرلر. بو شرطله کی، قونشو اویونچولار آراسیندا آزی 1 متر مسافه قالسین. ایکی چوخا و یا بیر یورغانی بوکوب کوْس (توپ) حالینا سالیر و کندیرله باغلاییرلار. بیر نفر اورتادا دایانیر. اویونا نظارت ائدن حاکیم کوْسو (توپو) اویونچولارا آتیر و بئله‌لیکله، اویون باشلانیر. اورتادا دایانان اویونچو کوْسو (توپو) یئرده اوتوران اویونچولارین الیندن آلماغا چالیشیر. اونلار ایسه بیر-بیرینه اؤتورورلر. اورتادا اولان اویونچو کوْسو (توپو) کیمدن آلا بیلیرسه، اونونلا یئرینی دَییشیر. موعاصیر ایدمان نؤوعلری‌نین چوخوندا بئله ترکیبلی مشق اویونلاری کئچیریلیر.

قایناق

• آینا اوشاق انسکلوپدیاسی، ایدمان گوج و گؤزللیک. باکی، "آینا مطبوع ائوی". 2004. ص.88.