گول-گول(اویون)

گۆل-گۆل - آذربایجاندا ان چوخ یازقاباغی (بایرام قاباغی) گونلرده، ائلجه ده دیگر مؤوسوملرده اساساً اوشاق و گنجلر آراسیندا، گئنیش شکیلده اوینانیلان قدیم اویونلاریندان بیریدیر.

اویونون قایداسی

ایکی قروپ و یا شخص آراسیندا اوینانیلیر. گول آدلاندیریلان خیردا بیر اشیانی، مثلا نوخودو، اوووجلارین ایچینده اوینادیب، بیر اوووجدا گیزله‌دیرلر. لاکین رقیب قروپدان هئچ کیم گولون هانسی اوووجدا اولدوغونو بیلمه‌مه‌لیدیر. گولو گیزله‌دن قروپ اوووجلارینی یوموب رقیب قروپون اؤنونه توتور. رقیب قروپ گولون هانسی اوووجدا اولماسینی تاپمالیدیر. گولو تاپسالار غالیب اولورلار، تاپا بیلمسه‌لر، گولو گیزله‌دن قروپ غالیب گلیر. اویوندا اوووجون بوش چیخماسینا "پوچ" دئییلیر.

آنلاتیم

چوخ سئویلن، هر کسین اوینایا بیله‌جه‌یی و هله ده اوینانان شیرین اویونلاردان دیر. بو اویونا هر نئچه نفر قاتیلا بیلر، آنجاق اویونجولارین سایی چوخ اولسا، نئچه دسته‌یه بؤلونوب اوینارلار. بیر دانا نوخود یا لوبیه، یا دا نئچه قات بوکولموش بیر کاغذی گول ائلردیک. اللریمیزی آپاراردیق دالیمیزا، گولو اووجلاریمیزین بیرینه قویوب، اووجوموزو یوموب، گتیریب ایکی یومولو الیمیزی اوزالداردیق قارشیمیزداکی اویونجویا. اگر گولون هانکی الده اولدوغونو تاپسایدی، گولو اونا وئرردیک و اویونا او دوام ائدردی. گولو تاپماسایدی، یئنه ده الیمیزی دالیمیزا آپاریب گولو گیزله‌دیب اؤنه توتوب سوروشاردیق: -ایه دئدین هانسیندا؟ -یا بوندادی یا بوندا حالواچی توکانیندا بابام دئدی وئئئر...بون...دان! اسکی زامانلاردا بو اویون قیشدا کورسو باشیندا اوینانان چوخ سئوینجلی اویونلاردان ساییلاردی. اللری آپاریب کورسو یورغانی‌نین آلتیندا گولو گیزله‌دردیلر، سونرا اللری چیخاردیب قویارمیشلار کورسونون اوستونه.بیزلرده قیشدا پتو یا یورغان چکیب اونون آلتیندا گول گول اویناردیق. بو اویوندا بولان سولان جیغاللیق ائلمک اولاردی!