سحر خیاوی
نجیبه رستم اوغلی (سحر خیاوی) تخلوصی ایله تانینمیش ایران آذربایجان خیاولی چاغداش تورکجه یازان شاعیر و یازیچی
| سحر خیاوی | |
|---|---|
| آد | نجیبه رستم اوغلو |
| قیسا بیلگی | شاعير ، یازیچی |
| دوْغوم تاریخ | ۱۳۴۶ گونش ایلی خیاو اردبیل |
| میللیت | ايران |
| آیری آدلار | سحر خیاوی |
| تحصیل | لیسانس |
یاشاییش
دَییشدیرسحر خیاوی ۱۳۴۶ گونش ایلی خیاو یا مشکین شهر ده دونیایا گوز آچمیشدیر. اورتا مکتب اویرتمنی دیر. شعری فارسجا یازماقلا باشلاییب آمما سونرالار تورکجه کیتابلاری اوخوماقلا و آنا دیلیمیزده مطالعه‌لرینی چوخالتماقلا تورکجه‌نی آرتیق منیمسه‌ییب تورکجه یازیب دیر. دئمک سحر خیاوی نین اصلی ادبی دوغوم ایلی ۱۳۷۵ نجی ایلده آنا دیلیمیزده یازماقلا باشلانیب دیر.
اثرلری و کتابلاری
دَییشدیرسحر خیاوی دن اوچ شعر کتابی خالقیمیزا اتحاف اولوب.
• و...قادین دانیشیر سربست شعرلر
• آغریلاریم اؤزگه دئییل کلاسیک شعرلر
• فاطما آفاق مسعود خانیمین رومانی‌نین کؤچورمه‌سی
دئمک سحر خیاوی نین نئچه کیتابلاری دا چاپ اوچون حاضیردیر:
• سئچیلمیش شعرلر: قاباقکی و یئنی شعرلریندن ان سئچیلمیش اثرلر
• قیسا حیکایه‌لری کیتابی
• شعر و حیکایه‌لری اوشاقلار اوچون
• افروزنامه(طنز یازیلار)
• چئویرمه‌لری(مطالعه‌لرینده اوخودوغو ایران و دونیا ادبیاتیندان قیسا حیکایه‌لر آنا دیلیمیزه چئویریب)
• بلکه باشقا کؤچورمه‌لر
چالیشمالاری
دَییشدیرسحر خیاوی نین قوزئی آذربایجاندا بوتا۳ و قیرخ ایل تورک شاعیرلری آنتولوژیالاریندا بیوگرافی و اثرلریندن یاییلیب.
عراقلی تورکمن شاعیر سمیر کهیه اوغلونون (باشقا بیر ماوی گوی) کیتابیندا نئچه گونئی آذربایجان قادین شاعیرلری له بیرگه بیوگرافی و اثرلریندن اؤرنک‌لر و نقدلر شاعیریمیزه و یارادیجی‌لیق دونیاسینا یازیلیب.
تزه‌لیکده (یوز اللی ایل گونئی اوشاق ادبیاتی) آنتولوژیمیزده اوتای آذربایجاندا چاپ اولوب.
بو تایدا دا بیر چوخ آنتولوژی‌لرده اثرلری چاپ اولوب کی بیر سبد قیزیل یومورتا کتابی اونلاردان بیری ساییلیر.
اثرلریندن اؤرنک
دَییشدیرسئوگی سئوینجسیز گونلریمیزه
گونلر کئچیر وَ بوش یئره تقویم واراقلانیر
سونبول کیمی بنؤوشه عؤمور-گون اوراقلانیر
سئوگی گونونده قول-بویون اولمور کی سئوگی‌لر
اللر چؤره‌ک قَمینده دیز اوسته داراقلانیر
یارما یاوان قالیر گئجه‌لر آج یاتیر بالام
ارباب ائوینده یاغ یاغین اوستدن تاباقلانیر
چوخدان سئوینجی، توی دویونو تام اونوتموشوق
گولمک ایتیبدی قاشلاریمیز دا قاباقلانیر
یعنی نیشانه‌سی یاشامین دیر قورو نَفَس
ویروسلانیب او بیرجه نَفَس ده داباقلانیر
مین دفعه سانجیلیب ایلانا هئچ آییلمیریق
آلدانمیشیق "آل"ا*، باشیمیز هئی پاپاقلانیر
اینجلمیشیک ائله، تورا بنزیر یاشام ایپی
بَتدیر پوفه، بئله لاپ اوجوندان ساپاقلانیر
گون گؤرمه‌میش و سئوگی تامین دادمامیش "سحر"
بیر گون خبر یئتر اؤلوم ایله آداقلانیر
دونیانین ان چتین ایشی
هردن دونیا دامیندا چارداق قورماق گره‌کیر
خلوتینده اؤزونه بیر فینجان نارینج چایی سوزمک
آخشام چاغی سَرینتیسنی دویا- سییا کؤکسونه چَکَرکن
سسسیزجه پامبیق بولودلارین سئحرینه دالماق
سمانین ماوی سینه‌سینده آغ
گؤیرچینلرین اوچوشونو ایزله‌مک
و...اوردان معنالی بیر تبسسومله
قالابالیقدا چابالایان بشری سئیر ائتمک
بعضن سوکوت اوروجو توتماق گره‌کیر
یئرین مرکزیندن چیخیب قیراقلاریندا یئریمک؛
ییخیلماق هؤولو اوره‌یینده
شئیطانجا آرخین قیراغیندان یئرییه‌ن؛
شیلتاق بیر اوشاق کیمی
اوزولمه، اوزاقلاردا دئییلم سئوگیلیم بوردایام، دونیا دامیندا
یالنیز قالابالیقدا ایتن "اؤزومه" برک داریخمیشام
بعضن هامینی ایتیریب اؤزونو تاپماق
دونیانین ان چتین ایشی دیر.
چوخ چکمیه‌جک
چوخ چکمیه‌جک آل گونشه یول چکه‌جکلر
سئوگی عَلَمین اُودلو دؤشونده اکه‌جکلر
چوخ چکمیه‌جک گولله‌نه جک غملی دوداقلار
قیزلار یئنه‌ده داغ- دره‌دن گول بیچه‌جکلر
چوخ چکمیه‌جک خط چکه‌ریک باطیلین اوسته
حاق ساغلیغینا حاققی سئونلر ایچه‌جکلر
چوخداندی آلیب کؤنلوموزو قاره بولودلار
نور یولچولاری، داندا قارانلیق سؤکه‌جکلر
روزگار قانادیلا اوچاجاق آتلی قوچاقلار
یئردن گونَشه بیر تاماشا یول چکه‌جکلر
قارقا تویودور، بیلدیگین ائتسین بو دومانلیق
قارتاللاریمیز گؤیلره آسفالت تؤکه‌جکلر
چوخ چکمیه‌جک آل گونَشه یول چکه‌جکلر
دوستلوق، باریشیق، بوللوغا مین قول چکه‌جکلر
سیل گؤزلرینی کؤنلونو سیخما گؤزو یاشلیم
آغ ائولی‌لره گؤر نئجه طوفان اسه‌جکلر
قایناق
دَییشدیرایشیق آذربایجان اینجه صنعت و شعر سایتی
وبسایت ائل دنیز Archived 2021-06-27 at the Wayback Machine.
شابلون:تورک ادبیاتی {آذربایجان تورکجه‌سی‌نین ادبیاتی}}
.jpg){kind=small} | بو تورک ادبیاتی ایله باغلی مقاله، بیر قارالاما مقاله دیر. بونو گئنیشلندیرمکله ویکی‌پدیایا کؤمک ائده بیلرسینیز. |