قاریش(اؤلچو بیریمی)

قاریش — اسکی واختلاردان بو گونوموزه قدر ایستیفاده ائدیلن تخمینی اوزونلوق اؤلچو بیریمی(واحیدی)‌دیر.

عومومی معلومات

آذربایجاندا گئنیش یاییلمیش خالق اوزونلوق اؤلچوسو بیریملریندن بیری ده قاریش آدلانیر. قاریش دا تورک سؤزودور. دیقّتی جلب ائدن مقاملاردان بیری بشر سیویلیزاسیاسی‌نین اینکیشافیندا عوضسیز رول اوینایان سومرلرین ده دیلینده تورپاق اؤلچمک اۆچون عئینی سؤزون اولماسیدیر. مشهور آمریکا سومرشوناسی س.ن.کرامئر سومرلره مخصوص "اکینچی‌نین تقویمی" متنینی ترجومه ائدرکن تورپاق اؤلچو بیریمی کیمی قاروش//قارئش سؤزونو عئینیله ساخلامیشدیر. سونرالار اونون اثری ("تاریخ سومردن باشلاییر") روس دیلینه ترجومه ائدیلرکن قارئش سؤزونه هئچ بیر دییشیکلیک ائدیلمه‌میشدیر.

س.ن.کرامئرین اثرینده قارئش سؤزو 6-7 م اوزونلوغوندا تورپاق زولاغی کیمی شرح ائدیلمیشدیر. بیر قارئشین سومرلرده 6-7 م-ه برابر گؤتورولدوگو او قدر ده ایناندیریجی گؤرونمور. حاضیردا چوخ دا دقیقلیک طلب اولونمایان یئرلرده خالق قاریشدان ایستیفاده ائدیر. قاریش الی آچیق وضعیتده توتدوقدا باش بارماغین اوجوندان چئچله بارماغین اوجونا قدر اولان اوزونلوغو بیلدیریر و بو دا اورتا حسابلا 0،213 م-ا، یعنی تقریباً 20 س‌م-ه برابردیر. ائل آراسیندا 5 قاریش 1 م-ه برابر (5×20 س م=100 س‌م=1 م) گؤتورولور.

بیر چوخ قایناقلاردا قاریشین تعریفی و اؤلچوسو دوزگون وئریلمیشدیر. ساده‌جه اولاراق بیر سیرا ادبیاتلاردا قاریشین 20 س‌م یوخ، 22-25 س‌م اولدوغو گؤستریلیر. بدیعی ادبیاتدا و فولکلوردا قاریش مجازلاشمیشدیر و چوخ آز میقداردا تورپاق معناسیندا ایشله‌نیر.

قایناق

آذربایجان ائتنوقرافیاسی، باکی-2007، "شرق-غرب" نشریاتی. اوچ جیلدده. 3. جیلد. ص. 455