اوستادنامه

اوستادنامه - آدیندان گؤروندویو کیمی اوستاد آشیقلارین سؤیله‌دیگی نصیحت آمیز سؤزلردیر. اونلاردا اولو آشیقلاریمیزین دونیا گؤروشو و حیات تجروبه‌لری عکس اولموشدور. چوخ زامان اوستادنامه‌لرده آتا سؤزلری شعرین قافیه و وزنی ایله اویغونلاشدیریلیب، اوستادنامه کیمی وئریلیر.

بیر قایدا اولاراق آشیقلار داستانا باشلامازدان اول اوستادنامه اوخویارلار. اؤزو ده بیر دئییل، ایکی دئییل، اوچ اوستادنامه اوخویوب سونرا اصل مطلبه باشلارلار.

دده قورقود کیتابیندا دا اثرین اولینده اوزان دده قورقود دیلیندن بیر چوخلو آتاسؤزونو قافیه‌لی نثر پارچالاری کیمی وئریلمیشدیر. کی بو دا دستاندان اول اوستادنامه سؤیله‌مک گله‌نگی‌نین چوخ قدیم اولدوغونو گؤسترمکده‌دیر.

اوستادنامه‌لر اکثر قوشما فورموندا اولسالار دا اونون دیوانی و گرایلی و موخمس شکیللری ده واردیر. آذربایجان دا آشیقلار اوستادنامه‌لری ایله داها چوخ مشهور اولان آشیق خسته قاسيم دیر.

اؤرنکدَییشدیر

اؤرنک اولاراق آشیق عاباس توفارقانلی دان ایکی اوستادنامه آشاغیدا وئریلیر:

  • سؤز بیر اولسا

بد اصیل اولادی باشدان تانیرام

چؤر-چؤپ ییغار، یاد اوجاغین یاندیرار.

سحر دورار عار، ناموسون گؤزله‌مز

سویو تؤکر اؤز اوجاغین سؤندورر.

اولغون جوشا گلسه، کؤپوک یاغ اولماز

سؤیود بار گتیرسه، باغچا، باغ اولماز

زیبیل تپه اولسا، کۆللوک داغ اولماز

یئل اسنده آلچاقلارا یئندیرر.

عابباس بو سؤزلری دئیر سریندن

آرخی قازین سویو گلسین دریندن

ائل بیر اولسا داغ اوینادار یئریندن

سؤز بیر اولسا ضربی کرن سیندیرار.

  • بَینمز

آی آغالار گلین سیزه سؤیله‌ییم:

آلا قارغا شوخ ترلانی بَینمز.

اوغوللار آتانی، قیزلار آنانی

گلینلر ده قاینانانی بَینمز.

آدام وار دولانار صحرانی، دۆزو

آدام وار دۆشورر گۆلو نرگیزی

آدام وار گئیمگه تاپانمیر بئزی

آدام وار آل گئیر، شالی بَینمز.

آدام وار چوخ ایشلر ائیلر ایرادا

آدام وار کی یئته‌بیلمز مورادا

آدام وار کی چؤرک تاپماز دونیادا

آدام وار یاغ یئیر، بالی بَینمز.

آدام وار کی آداملارین ناخشیدی

آدام وار کی آنلامازدی، ناشیدی

آدام وار کی حئیوان اوندان یاخشیدی

دیندیرنده هئچ اینسانی بَینمز.

آدام وار الینه وئره‌سن گۆللر

آدام وار گؤزونه چکه‌سن میللر

توفارقانلی عابباس باشینا کۆللر

نه گونه قالیبسان قاری بَینمز.

قایناق‌لاردَییشدیر

  • تورک خلق ادبیاتی - یازان: علیرضا صرّافی

شابلون:Ədəbiyyat-qaralama