ایستانیسلاو پتروف

ایستانیسلاو پتروف (روس.Станислав Евграфович Петров) (دوْغوم:7 سپتامبر 1939- اؤ‌لوم:19 مئی 2017)-روس استراتژی راکت قووّه‌لری‌نین سابیق پولکوونیک-لئیتینانتی(سرهنگ2). 26 سپتامبر 1983-جو ایلده رادارلاردا آمریکانین شوروی‌یه قارشی کوتلوی راکت هوجومونا باشلادیغینی گؤرور. اوّلکی تجروبه‌لرینه اساس‌لاناراق بونون کامپیوترلرین سهوی اولا بیله‌جگینی دوشونور و روس اوردوسونون پروسدورالارینا محل قویمایاراق گؤزله‌مگه قرار وئریر. اونون بو قراری حربیچی کاریئراسینی بیتیرسه ده، شوروی  طرفیندن آمریکایا ائدیله‌جک نووه هوجومونون قارشی‌سینی آلماقلا نووه ساواشی‌نین باش وئرمه‌سینی اؤنله‌ییر. 

ایستانیسلاو پتروف
پتروف ائوینده، 2016
دوغوم
Stanislav Yevgrafovich Petrov

۷ سپتامبر ۱۹۳۹
اؤلوم۱۹ مئی ۲۰۱۷ میلادی (۷۷ یاش)
تانینماق سببی1983 شوروی‌‌ نووه یانلیش سیقنال حادیثه‌سی
حیات‌یولداشی(لاری)رایسا پترووا (دوغوم. 1973; اؤلوم 1997)
اوشاقلاری2
حربی فعالیتی
باغلیلیق شوروی
قوشونشوروی هاوا مودافیعه قووه‌لری
خیدمت ایللری1972–1984
روتبهپولکوونيک-لئيتينانت

یاشاییشی دَییشدیر

  تام آدی ایله  ایستانیسلاو ائوگرافوویچ پتروف 7 سپتامبر 1939-جو ایل تاریخینده ولادی‌ووستوک شهری یاخین‌لیغیندا آنادان اولموشدور. آتاسی یئوقراف ایکینجی دونیا ساواشی زامانی هاوا قووّه‌لرینده خیدمت ائتمیشدیر. آناسی ایسه طیب باجیسی اولموشدور. شوروی هاوا قووّه‌‌لری نزدینده کی‌یئف یوکسک تکنولوژی‌لر کالجینه داخیل اولان پتروف 1972-جی ایلده بورانی بیتیرمیش و شوروی هاوادان مودافیعه  قووّه‌‌لرینه قبول ائدیلمیشدیر. 1970-جی ایللرین اوّل‌لرینده او ناتو اؤلکه‌لری‌نین بالیستیک راکت هوجوم‌لارینی آشکار ائتمک اوچون نظرده توتولان ائرکن خبردارلیق سیستمینه نظارتچی وظیفه‌سینه تعیین اولونور. رایسا آدلی خانیملا عاییله حیاتی قوران پتروفون بو نیحاحدان دمیتری و یئلنا آدلی ایکی اؤولادی دونیایا گلمیشدیر. داها سونرا یولداشی 1997-جی ایلده سرطان خسته‌لیگیندن وفات ائتمیشدیر. ایستانیسلاو پتروف ایسه 19 مئی 2017-جی ایل تاریخینده دونیاسینی دییشمیشدیر.[۱]

26 سپتامبر 1983 حادیثه‌سی دَییشدیر

  ایستانیسلاو پتروف، 26 سپتامبر 1983-جو ایل تاریخینده موسکو یاخین‌لیغیندا یئرلشن سِرپوُخوف-15 مخفی حربی حیصه‌سی‌نین نؤوبتچی ظابیطی ایدی. سؤزوگئدن حربی حیصه‌نین تعییناتی شوروی - آمریکا آراسیندا موناسیبت‌لرین هئچ ده ایستی اولمادیغی بیر دؤورده آمریکانین هاوا هوجومو قووّه‌لرینه نظارت اولوب.اونون اساس وظیفه‌سی ائرکن خبردارلیق سیستمینی ایزله‌مک و هر هانسی بیر هوجوم زامانی ان سورعتلی شکیلده اوست قوروم‌لاری بو هوجومدان خبردار ائتمک ایدی.[۲] سویوق ساواشین کسکینلشدیگی بیر زاماندا شوروی اوردوسو آمریکا هوجومونو دفع ائتمک اوچون درحال عکس هوجوما کئچه‌رک قارشی طرفین بؤیوک ایتکی‌لر وئرمه سینه یول آچان تاکتیک ایشله‌دیردی (اینگیلیس. Launch on Warning). پولکوونیک-لئیتنانت ایستانیسلاو پتروف آخشام ساعات 8-ده نؤوبه‌نی قبول ائدیر. نؤوبتچی حیصه‌ده یئرلشن بوتون رابیطه  و کامپیوتر سیستم‌لری یوخلادیقدان سونرا، بوتون مودافیعه  و خبردارلیق سیستمینی عکس ائتدیرن م-10 مونیتورونون سازلیغینا خوصوصی دیقت یئتیریر و ژورنالدا نؤوبتچی حیصه‌ده هر شئیین قایداسیندا اولدوغو قئید ائدیر. ساکیت باشلایان نؤوبه بیر-نئچه ساعاتدان سونرا هیجان‌لارلا موشاییعت اولونور. بئله کی، آرتیق سپتامبرین 26-دا 00:15 دقیقه ده سیستمده قیرمیزی رنگده  "‌ایستارت‌"  سؤزو گؤرونور. بو آرتیق آمریکانین نووه باشلیقلی بالیستیک راکتی‌نین ایستارتی دئمک ایدی. بیر نئچه دقیقه‌دن سونرا 2-جی راکتین بوراخیلماسی مونیتوردا اؤز عکسینی تاپیر، داها بیر نئچه دقیقه‌دن سونرا ایسه آمریکانین اوچونجو راکتی مونیتوردا گؤرونور. پتروف بو خبردارلیغین بیر خطادان مئیدانا گلدیگینی دوشونور. بوندان باشقا سؤزو گئدن زامان بئله ائرکن خبردارلیق سیستمی‌نین ایشله‌مه پرینسیپی موختلیف شوبهه‌لر دوغوروردو. تعلیماتا اویغون اولاراق عکس طرفدن گلن راکت هوجومونو نؤوبتچی ظابیط قئیده آلدیقدان درحال سونرا رهبرلیگه معروضه ائتمه‌لی ایدی. قئید ائدک کی، نؤوبتچی حیصه‌ده شوروی-‌نین مودافیعه  ناظیری و DTK صدری ایله بیرباشا مخفی کودلاشدیریلمیش رابیطه علاقه‌سی اولوب. بو جور وضعیت یاراندیقدا نؤوبتچی ظابیطین معروضه‌سیندن سونرا 40 دقیقه  عرضینده قارشی طرفه ائله نووه بومباسی ایله ده جاواب وئریلمه‌لی ایدی. پتروف امین ایدی کی، اونون معروضه‌سیندن سونرا شوروی رهبرلری نووه سیلاح‌لاری‌نین دویمه‌لرینی درحال باساجاقدیلار.  بو ایسه آتوم بومباسی‌نین آمریکایا آتیلماسی دئمک ایدی. نؤوبتچی ظابیط بو احتیمالی نظره آلاراق مسئولیتی اؤز اوزرینه گؤتوره‌رک، معروضه ائتمک اوچون تلسکنلیگه یول وئرمیر.[4] تجروبه‌سینه و بیلیگینه گوونه‌رک سیستمده خطالارین مئیدانا گلدیگینی، سیقنال‌لارین یانلیش اولدوغونو دوشونور. ایلک خبردارلیقدان سونرا سیستم آرد-آردا 4 راکتین ده شوروی-یه یاخینلاشدیغی سیقنالینی وئریر. بو اولدوقجا بؤیوک بیر ریسک ایدی. چونکی عکس تقدیرده بو شوروی اراضی‌سینه بیر نئچه آتوم بومباسی‌نین دوشمه‌سی ایله نتیجه‌لنه‌جکدی. او، هئچ بیر اساسی اولماسا دا، یئنه سیستمین سهو ایشله‌دیگینی دوشونه‌رک عکس هوجوما کئچمیر و گؤزله‌مگه داوام ائدیر. گرگین دقیقه‌لردن سونرا راکت‌لرین گؤرونمه‌مه‌سی پتروفون حاقلی اولدوغونو ثوبوت ائدیر. هاوادا هئچ بیر راکت یوخیدی و پئیک‌لرله اونسیتده اولان ائرکن خبردارلیق سیستمی سهوه یول وئرمیشدی. آپاریلان آراشدیرمالار نتیجه سینده مئیدانا گلن  خطانین چوخ نادیر بیر حادیثه  اولدوغو و موْلنیا اوْربیتی اوزرینده اولان آتموسفرده یئرلشن بولودلارین اوزرینه گون ایشیغی‌نین دوشمه‌سیندن قایناقلاندیغی معلوم اولور. 

حادیثه‌دن سونرا دَییشدیر

  چوخ کئچمه‌دن پتروف روس اوردوسونون پروْسِدورالاریندان کنارا چیخاراق قرار قبول ائتدیگینه گؤره گوناه‌لاندیریلیر. بونون ایلک سببی پتروفون داورانیشی‌نین ایلک نؤوبه‌ده ائرکن خبردارلیق سیستمی‌نین سهولرینی آچیقجا اورتایا قویماسی و روس اوردوسونون شؤهرتینه خلل گتیرمه‌سی ایدی.[۳] نتیجه‌ده رهبرلیک طرفیندن تؤهمت وئریله‌رک، گله‌جک کاریئراسی‌نین دا قارشیسی آلینیر. بیر مودت داها آشاغی بیر وظیفه‌ده خیدمت ائتدیکدن سونرا صحتی ایله باغلی یارانان پروبلم‌لره گؤره تقاعوده چیخیر. عؤمرونون سونونا کیمی آیلیق 200 دولار تقاعودله موسکوویلایتی‌نین فریازینو شهرینده یاشاییر. 

اؤدول‌لری دَییشدیر

  21 مئی 2004-جو ایلده سان فرانسیسکودا فعالیت گؤسترن "Association of World Citizens " قورومو طرفیندن  "‌دونیا وطنداش‌لیغی‌"   اؤدولونه لاییق گؤرولموشدور.اؤدول‌له یاناشی اونا بؤیوک بیر فاجیعه‌نین قارشی‌سینی آلدیغینا گؤره سمبولیک 1000 دولار تقدیم ائدیلیر.[6] 2006-جی ایلین ژانویه آییندا آمریکایا سیاحت ائدن پتروف بورادا آمریکالی ژورنالیست وولتر کرونکایت ایله تانیش اولور و CBS-این نیو یورکدا یئرلشن دفترینده موصاحیبه وئریر. بو موصاحیبه‌سی و نیو یورکا سیاحتی اساسیندا " دونیانی خیلاص ائدن آدام "  آدلی سندلی فیلم چکیلیر. یؤنتمن پیتر آنتونی طرفیندن چکیلن بو فیلم 2014-جو ایلده Woodstock فیلم فستیوالیندا  " Honorable Mention: Audience Award Winner for Best Narrative Feature"  و  "onorable Mention: James Lyons Award for Best Editing of a Narrative Feature"  اؤدول‌لرینه لاییق گؤرولور. بوندان باشقا 2013-جو ایلین 17 فوریه تاریخینده درسدن اؤدولو و 32 مین دولار ایله تلطیف اولونور. 

اتک یازی‌لار دَییشدیر

  1. ^ Stanislav Petrov, Soviet Officer Who Helped Avert Nuclear War, Is Dead at 77
  2. ^ Nüvə müharibəsinin qarşısını alan növbətçi zabit
  3. ^ I Had A Funny Feeling in My Gut