پوْرتال:تبریز/حاقیندا
تبریز ، آذربایجانین ان بویوک شهری، و ایرانین بؤیوک شهرلریندن بیری و شرقی آذربایجان اوستانینین باشکندی دیر. بۇ شهرین نوفوسو، ۲۰۰۶-اينجی ایلين نوفوس سایی‌سی اساسيندا ۱٬۵۵۸٬۶۹۳ نفر ايميش و بونا اساسا آذربایجانین ان بؤیوک شهری و ایرانین دؤردونجو ان بؤیوک شهری حساب اولور. بۇ شهرده چوخلو کارخانالار یئرلشیبدیر و ایرانین ان بؤیوک صنعتی شهرلریندن بیری ساییلیر. بۇ شهر قوزئیدن عئینالی داغینا، گونئیدن سهند داغینا و باتیدان تربیز چؤلونه محدود دور. تبریز شهری نئچه بؤیوک سولاله‌نین او جومله‌دن ائلخانیلر و صفوی‌لرین باشکندی و هابئله قاجارلارین ولیعهد اوتورموش شهری‌دیر.
تبریز شهری آذربایجانین قدیم شهرلریندن بیریدیر و اونون قیدمتی ۴٬۵۰۰ ایل بوندان قاباغا یئتیشیر.
شاردئن، ۷ینجی یوز ایلده تبریز حاققیندا یازیر کی: عالمده من بیر شهر تانیمیرام کی یارانماسی و ایلک آدی باره‌ده یئنی یازیچیلار بۇ قدر چوخ، بحث و جدل ائله‌ییبلر.
چوخلو اوروپالی توریست‌لر کی ۱۷ینجی و حتتی ۱۸ینجی و ۱۹ونجو یوزایللیک‌لرده تبریزدن گئچیب‌لر، تبریزی همان قدیم ایکباتان سانیب‌لار. تاورانی‌ییه کی شاردئنده‌ن قاباق تبریزده‌ن گؤروش ائله‌ییب، یازیر کی: بعضی‌لرین عقیده‌سی بودور کی تبریز همان قدیم ایکباتان ، ماد مملکتینین پایتختی‌دیر.
اولئآری‌یوس کی ۱۷ینجی یورایللیگین ایلک یاریسیندا تبریز دن گئچیب، قدیم ایران شاهلارینین پایتخت‌لریندن سوز ائده‌ن زامان، ایظهار-ی نظر ائله‌يیر کی: اونلار یایدا ایکباتانا – کی ایندیجه اورانی تبریز آدلاندیریرلار – داشیناردیلار.
لابولای لو ْگوزدا کی ۱۷ینجی یوزایللیگین آرالاریندا موددت‌لرجه ایران‌دا یاشاییب، بۇ اینامدا ایدی کی: تبریز اسکی ده اؤکباتان آدلانیردی، او یئر کی ماد شاهلارینین کیتاب ائوی ایدی. گاسپار دئ ويل کی ۱۹ونجو یوزایللیگین ایلک ایل‌لرینده تبریز ده ایدی، تردیدله یازیر کی: تبریز کی تصووور ائله‌ییرلر قدیم ایکباتاندی – باخمایاراق کی بعضی تاریخ‌چی‌لر همدانی ایکباتان بیلیرلر و نهایت بیزیم روزیگاردا سئیید ایسماییل وکیلی‌دیر کی اخی سعدالدین تپه‌سینی کی ولیان(بیلان) داغی‌دا آدلانیر و تبریزین قوزئی‌دوغوسوندا بیر تپه‌دیر، ایکباتان شهری‌نین یئری سانیر.