ژنرال آغا محمد یحیی خان قیزیلباش (4 فوریه 1917-10 آقوست 1980) — ایوب‌خانین ایستعفاسیندان سونرا 1969-جو ایلدان 1971-جی ایله‌دک حاکیمیته گلمیش پاکیستانین اۆچونجو جومهور باشقانی‌دیر.

ژنرال آغا محمد یحیی خان قيزيلباش
پاکیستان جومهور باشقانی
دوْغوم تاریخ4 فوریه 1917
چاکوال،‌ پاکیستان
اؤلوم تاریخ10 آقوست1980
اسلام آباد،پاکیستان
اۇشاقلاریعلی یحیی، یاسمن یجیی

یاشاییشی دَییشدیر

1738-جی ایلده نادر شاهین اوردوسو ایله هیندیستانا گلمیش قیزیلباش خانلاری‌نین تؤرمه‌سی یحیی خان 1917-جی ایلده پنجاب ویلایتینین قاسور شهری یاخینلیغیندا منشاجه اوغوز تورکلریندن اولان قیزیلباش عاییله‌سینده دوغولموشدور.

پنجاب بیلیم‌یوردونو بیتیرندن سونرا، یحیی خان دهرادون شهرینده هیند حربی آکادئمیاسینا داخیل اولور. 1938-جی ایلده، او، شیمال-غرب سرحد ویلایتینده یئرلشن بریتانیا هیندیستانی اوردوسونون حربی حیصه‌سینده خیدمته باشلاییر. ایکینجی دونیا موحاریبه‌سی زامانی شیمالی آفریقا، عراق و ایتالیادا ووروشموشدور.

بریتانیا هیندیستانی اراضیسینده موستقیل هیندیستان و پاکیستان دؤولتلری‌نین یارانماسیندان سونرا یحیی خان پاکیستان حربی-قرارگاه کالجی‌نین تشکیلنده موهوم رول اوینامیشدیر. او، 1965-جی ایل موحاریبه‌سینده پیاده دیویزییایا کوماندان‌لیق ائتمیش، ژنرال روتبه‌سینی آلمیش و 1966-جی ایلده پاکیستانین قورو قووّه‌لری کوماندانی تعیین ائدیلمیشدیر.

1969-جو ایلده بوتؤو اؤلکه‌ده وضعیت نظارت آلتیندان چیخماغا باشلاییر و اؤلکه‌نین جومهورباشقانی ایوب خان حاکیمیتی قورو قوشون‌لار قرارگاهینی ریسی ژنرال یحیی خانا تحویل وئرمگه مجبور اولور. حاکیمیته گلدیگی ایلک گوندن یحیی خان اؤلکه‌ده حربی وضعیت اعلان ائتدی و آنایاسایا خیتام وئردی.

1969-جو ایل مارس آیی‌نین 31-ده یحیی خان رسمی اولاراق پاکیستان ایسلام جومهوریتی‌نین باشقانی اعلان ائدیلدی. لاکین، او دا اؤلکه‌ده‌کی وضعیتی نیظاملایا بیلمه‌دی. اونون شرقی پاکیستاندا (حال-حاضیرکی بنگلادش) بنگاللارین عوصیانینی یاتیرماق اۆچون اوردودان ایستیفاده‌سی 1971-جی ایلده پاکیستانلا هیندیستان آراسیندا موحاریبه‌نین باشلانماسینا سبب اولدو.

یحیی خانین باش کوماندان‌لیغی آلتیندا پاکیستان اوردوسو بو موحاریبه‌نی اودوزدو، اؤلکه ایکی حیصه‌یه پارچالاندی و بنگاللار پاکیستانین ترکیبیندن چیخیب موستقیل بنگلادش جومهوریتی‌ اعلان ائتدیلر. بنگلادشده یئرلشن  90000 پاکیستان عسگری بنگلادیشلی‌لرین کؤمگینه گلمیش هیندیستان اوردوسونا تسلیم اولدو.

بنگلادشین دککه شهرینده پاکیستان حربی قووّه‌لری‌نین هیندلی‌لره موقاویمت‌سیز تسلیم اولماسی یحیی خانی اؤلکه‌نین ان منفی پرسوناژینا چئویردی. جمعیتین بوتون دایره‌لری‌نین نوماینده‌لری یحیی خانی تنقید ائتمگه باشلادی، و او، 1971-جی ایل دسامبرین 20-د، حاکیمیتی پاکیستانین ان پوپولیار سیاستچیسی ذولفقار علی بوتویا  تحویل وئرمگه مجبور اولدو.

1972-جی ایلده بوتو،  یحیی خانی ائو دوستاغی ائتدی. لاکین 1977-جی ایلده بوتونون اؤزو حربی چئوریلیش نتیجه‌سینده دئوریلدی. بوندان سونرا شیمال-غرب ویلایتینین قوبرناتورو ژنرال فاضل حاق یحیی خانی ائو دوستاقلیغیندان قورتاردی. یحیی خان 1980-جی ایل آقوستون 10-دا راوالپیندی شهرینده وفات ائتمیشدیر.

قایناق دَییشدیر

Mədəniyyət və Etnoqrafiya Portalı

ائشیک باغلانتی دَییشدیر

پاکیستان پرئزئنتی اولان آذربایجانلی Archived 2017-04-06 at the Wayback Machine.