آشیق میرزه بلال
| آشیق میرزه بلال | |
|---|---|
 | |
| آد | آشیق مبرزه بلال |
| دوْغوم تاریخ | 12 مارس 1872 شیروان قزاسی ، آغسو رایونو، قَشَد کندی |
| اؤلوم تاریخ | 26 نوامبر 1937 (65 یاشیندا) |
| اؤلوم سببی | رپرسسیا قوربانی |
| میللیت | آذربایجانلی |
| آیری آدلار | میرزه بلال مصطفی اوغلو میکاییل‌اوو |
| ایش | آشیق-شاعیر |
| حیات یوْلداشی | سلطان خانیم طالب قیزی |
آشیق میرزه بلال مصطفی اوغلو میکاییل‌اوو (12 مارس 1872، آغسو – 26 نوامبر 1937) — آشیق، شاعیر.
یاشاییشی دَییشدیر
1872-جی ایل مارس آیی نین 12-ده شیروان قزاسی نین آغسو رایونوندا قَشَد کندینده آنادان اولموشدور. هم‌یئرلیسی موللا خاصی‌نین مکتبینده اوخوموش، سونرا شاماخیدا بؤیوک معاریفچی سئید عظیم شیروانی‌نین مکتبینده تحصیلینی داوام ائتدیرمیشدیر. بورادا او، عرب-فارس دیللرینی کامیل اؤیرنمیش، کلاسیک پوئزییایا دریندن بلد اولموشدور. شاماخی ادبی موحیطی – " بیت‌الصفا " و مِسنانت محمود آغا احمد آغا اوغلونون موسیقی-شعیر مجلیسی اونو صنعت دونیاسینا باغلامیشدیر. محمود آغا مجلیسینده انگه‌خارانلی آشیق ابراهیم‌له تانیشلیغی اونون اوشاقلیقدان قلبینی اووسونلایان آشیق صنعتینه محبتینی جوشدورموشدور. اوستادی نین مصلحتی ایله او، موغاملاریمیزین سیرلرینی " شیروان بولبولو " میرزه محمدحسن‌دن موکمل شکیلده منیمسه‌ییب، ائل مجلیسلرینه آیاق آچیر. او، قیرخ ایله یاخین شیرواندا بو صنعتی یاشاتمیش و اونلارلا شاگیرد یئتیشدیرمیشدیر.
بؤیوک نوفوذ صاحیبی اولماسی حؤکومت یئتکی‌لیلری نین نظریندن یایینمامیش، اونا آذربایجان خالق جومهوریتی دؤورونده (1918-1920) شاماخی قزاسی‌نین امنیت مودیری وظیفه‌سی حواله اولونموشدور. اونون رِپرسسیا قوربانی اولماسی‌نین اساس فاکتورلاریندان بیری ده محض بودور. آشیق میرزه بلالین رپرسیا اولونماسی‌نین دیگر اساس سببی ایسه اونون، یارادیجیلیغیندا و آشیق‌لیق فعالیتینده سووئت رژیمینی‌نین قویدوغو قاداغالارا رعایت ائده بیلمه‌مه‌سی اولموشدور. 1928-جی ایلده باکی‌دا آذربایجان آشیقلاری نین بیرینجی قورولتایی نین نوماینده‌سی اولموش و قورولتایدا بوتون آشیقلار آدیندان چیخیش ائتمیشدیر. آشیق میرزه بلالین کولّیاتی یعنی، شعیر و داستانلاری نین بؤیوک بیر حیصه‌سی، NKVD طرفیندن املاکی موصادیره اولونارکن اله کئچیریله‌رک محو ائدیلمیشدیر.
شیروانلی آشیق میرزه بلال 1937-جی ایل ژوئن آیی‌نین 17-ده حبس ائدیلمیش، همین ایلین نوامبر آیی‌نین 26-دان 27-نه کئچن گئجه " خالق دوشمنی " آدی آلتیندا گوللـه‌لنمیشدیر. س‌س‌ری عالی محکمه‌سی‌نین جینایت ایشلری اوزره محکمه کوللگیاسی 12 اوکتوبر 1955-جی ایلده میکاییل‌اوو بلال مصطفی اوغلونون ایشینه یئنیدن باخاراق اونون حاقیندا اولان آذربایجان س‌س‌ر XDİK اوچلوگونون 10 نوامبر 1937-جی ایل تاریخلی قرارینی لغو ائتدی و او، برائت آلدی. آشیق میرزه بلالین حبس اولونارکن دئدیگی " منی گوناهسیز توتورلار " سؤزلرینی ان نهایت، دؤولت اؤزو ده تصدیق ائتدی.
آذربایجان جومهوریتی پروکورورلوغونون 28 اوکتوبر 1993-جو ایل تاریخلی قراری ایله بلال مصطفی اوغلو یئنیدن برائت آلمیشدیر.
ابدی‌یاشار صنعت پیرامیداسی‌نین خوصوصی مرحله‌سینده – 19. عصرین سونلاریندا مئیدانا چیخان قشدلی میرزه بلال، شیروان آشیق صنعتینی معنا و مضمونجا یئنی اینکیشاف مرحله سینه یوکسلتمیش، موعاصیر شیروان آشیق مکتبی نین اساسینی قویموش، " شیروان آشیقلاری نین آتاسی " تیتولونو قازانمیش نهنگ بیر سیما اولموشدور.
دستانلاری دَییشدیر
آشیق میرزه بلال، " سفیه و ضیاد"، " آشیق بلال و سلطان خانیم"، "یئتیم سلطان"، "مصطفی خان"، " آشیق ابراهیم و پری"، آشیق بلال و صنم"، "حضرت بابا" آدیلی دستانلار باغلاییب.
شجره سی دَییشدیر
بابا
سلطان
خلیل
میکاییل
مصطفی
کیتابلاری دَییشدیر
- " آشیق بلال. شعیرلری " ، باکی، 1960.
- " ایلک باهاریم، گل گؤروم " ، باکی، 1982.
- " بیر واخت شام-چیراقلا گزرلر منی " ، باکی، " علم و تحصیل " ، 2012. 104 ص.، 500 تیراژ.
قایناق دَییشدیر
- شخصی ایشی RDTK--نین آرخیوی № 13773.
- آذربایجان آشیق شعیریندن سئچمه‌لر. ایکی جیلدده. ایکی جیلد. باکی، " شرق-غرب " ، 2005. ص.124-128.
- موسی نبی‌اوغلو. " اوزان-آشیق دونیاسی " . باکی: نورلان، 2010، (شکیللی)، ص.13.