دئییشمه
دئییشمه - ایکی آشیغین آراسیندا شعریله یاریشما دئمکدیر. بعضا ایکی آشیغین آراسیندا یاخود دا داستانلاردا اولان ایکی شخصیتین آراسیندا اوز وئرن عادی دیالوقا دا دئییشمه دئییرلر. تاریخ بویو آشیق صنعتینده بئله بیر گله‌نک وارمیش کی مجلیسلرده آشیقلار خلقین قاباغیندا بیر- بیریله دئییشرمیشلر. هانسی‌سی جوابدان قالسایدی سازی الیندن آلیناردی.
دئییشن آشیقلارین چوخ فی البیداهه شعر دئمک قابلیتی، سؤز خزینه‌سینین زنگینلیگی و هر طرفلی معلوماتا و بیلیگه صاحیب اولماسی لازیم گلیر. دئییشمه‌ده آشیغین بیری بیر بند قوشوب، رقیبی اولان آشیقدان اونون جوابینی ایستر. جواب ایسه بیر بندده، اؤزو ده دئییشن آشیغین قافیه‌لریله عئینی اولمالیدیر. یاریش شعرین سون بندینه دک داوام ائدر. دئییشمه‌نین حربه – زوربا، قیفیل بند، باغلاما نوعلری وار. بعضا اوندا دوداق دَیمز، تجنیس کیمی فورملاردان دا ایستیفاده اولونار کی بو دا یاریشمادا نائیلیت قازانماغی داها دا چتینلشدیرر. دئییشمه‌نی باشلایان آشیق هانسی شعر فورمونو سئچدیسه، قارشی طرفده عئینی فورمدا و عئینی قافیه‌ده اونا جواب وئرملی‌دیر.
اؤرنک اۆچون آشاغیدا لزگی احمد ایله خسته قاسیم آراسیندا کئچن بیر دئییشمه وئریلیر:
لزگی احمد:
سندن خبر آلیم، آی دده قاسیم:
او نه دیر کی دورلو-دورلو حالی وار؟
نه دن خلق اولوندو عرشین آرغاجی
او نه دیر کی توخونمامیش خالی وار؟
خسته قاسیم:
سنه جواب وئریم آی لزگی احمد:
باهاردیر کی دورلو-دورلو حالی وار.
نوردان خلق اولوندو عرشین آرغاجی
او بولوددور توخونمامیش خالی وار.
لزگی احمد:
او نه دیر کی دایانیبدی دایاقسیز؟
او نه دیر کی بویانیبدی بویاقسیز؟
او نه دیر کی دوغار السیز، آیاقسیز،
اوچ آی کئچر آیاغی وار، الی وار؟
خسته قاسیم:
گؤی بیر چادیر دایانیبدی دایاقسیز.
آیلان گۆندور بویانیبدی بویاقسیز.
قورباغادیر دوغار السیز، آیاقسیز
اوچ آی کئچر آیاغی وار الی وار.
لزگی احمد:
لزگی احمد دئیر: گلر دالالار
نه قوماشدیر ساتان اولماز، آلالار؟
او نه دیر کی دیمدیگیندن بالالار؟
اونه دیر کی قانادیندا خالی وار؟
خسته قاسیم:
خسته قاسیم دئیر: یاشدیر دالالار
او آغیلدیر ساتان اولماز آلالار
او بوغدادیر دیمدیگیندن بالالار
کپنکدیر قانادیندا خالی وار
قایناق‌لار دَییشدیر
تورک خلق ادبیاتی - یازان: علیرضا صرّافی